भासाई अस्मिता बर लोगन लs सतत जगाये के किरिया संग छत्तीसगढ़ी भासा जनजागरन अभियान के छेवर

छत्तीसगढ़ी अस्मिता अभियान हर राजधानी के बाद जम्मों जिला मँ होहय , ईही किरिया के साथ जनजागरन अभियान के छेवर।

छत्तीसगढ़ी लs पराथमिक सिक्छा के माधियम अऊ कामकाज के भासा बनाये बर नाहके 3 दिन ले सल्लग चलत जनजागरुकता अभियान के आज छेवर होगे जेमा प्रदेस भर छत्तीसगढ़ी बर बुता करईया साहितकार, कवि, समाजसेवी, लेखक हजारो लोगन मन जुडिन अऊ ए अभियान के उत्साह अऊ सफलता ल देखते हुये किरिया खाये गईच्च कि ए अभियान हर राजधानी मँ तो छेवर होगे फेर ए अभियान ल अऊ चोख्खु करे बर हर जिला मँ अभियान चालु करबो।

छत्तीसगढ़िया क्रांति सेना, छत्तीसगढ़ी एम.ए. छात्र संगठन, छत्तीसगढ़ी राजभासा मंच के साथ ए अभियान के मुख्य आयोजन करईया संगठन छत्तीसगढ़िया महिला क्रांति सेना के प्रदेस अध्यक्छ लता राठौर हर कहिच्च कि ए अभियान के प्रमुख उद्देस्य जनता ल जगाना आंय न कि सरकार के विरोध करना काबर कि ए सरकार के आये ले छत्तीसगढ़ी बर सानदार माहौल बने हे बस ए सरकार ल एक कदम आऊ आघु बढ़ना हे अऊ हमन ल पक्का विस्वास हे कि सरकार ए दिसा मँ आघु रेंगही । फेर मुख बात तो ए आंय कि सरकार अगर छत्तीसगढ़ी लs माध्यम बना दिहिच्च त का छत्तीसगढ़िया मन अपन लईका लs ए माध्यम के ईस्कूल मँ पढ़ाहय ? काबर कि हम खुद छत्तीसगढ़िया मन अपन महतारी भासा ल पिछड़े के भासा समझथन तभे हमर पुरा पुरा फोकस जनता ल जगाये के हवय ।