झेंझरी टुकनी..आरो निमार के

पराथमिक सिक्छा के माधियम महतारी भाखा ही होवय तेखर बर हस्ताक्छर अऊ जनजागरन उदिम । जेखर सुरवात बेलासपुर परेस कलब ले बेलतरा बिधायक रजनीस सिंघ हर हरी झंडा बताके करिच्च अऊ ओखर बाद नियाय के सबले बड़का मंदिर हाईकोर्ट परिसर तक साईकिल/फटफटी  जातरा करे गईच्च । जातरा के सुरु दिन बिधायक , पारसद , बकील सहित सईकड़ो मनखे सो हस्ताक्छर लेहे गईच्च, अऊ तिफरा बस्ती मँ जनजागरन चलाये गईच्च। छत्तीसगढ़ी राजभासा मंच के परांतीय संयोजक नंदकिसोर सुकुल हर बताईच्च कि ए अभियान के छेवर 21 फरवरी (बिस्व महतारी भाखा दिवस) के दिन होही। ए मंऊका मँ छत्तीसगढ़िया महिला क्रांति सेना प्रमुख लता राठौर हर कहिच्च कि ए कईसे बिडम्बना आंय कि छत्तीसगढ़िया ल अपने भासा मँ पढ़ई लिखई करवाये बर हस्ताक्छर अभियान चलाये ल पड़त हे जबकी महतारी भासा मँ सिक्छा पाना हमर संम्बिधानिक , कानुनी अधिकार आंय।