झेंझरी टुकनी..आरो निमार के

दुल्हा-दुल्हन हर शादी मंडप ले हसदेव जंगल ल बचाये बर पारिच गोहार । हसदेव ल बचाये बर लोगन मन लगातार आघु आवत हे अऊ धरना , मनखे सिरंखला , ग्यापन देके जागरुक लोगन मन जंगल ल बचाये बर हरसंभव प्रयास करत हे अऊ इही बीच म तखतपुर के कौशिक परिवार के दुल्हा दुल्हन द्वारा बिहाव के मंच ले ही हसदेव जंगल ल बचाये के गोहार पोस्टर के माध्यम ले लगाईच। छत्तीसगढ़ी भासा के विकास बर तखतपुर ले रायपुर तक सायकल यात्रा कर चुके उमेश कौशिक माने दुल्हा के बरात काठाकोनी तखतपुर क्षेत्र ले हरदीटोना बिल्हा बर गईच्च जिहा जयमाला अऊ भांवर के बाद दुल्हा हर दुल्हिन के साथ बराती घराती अऊ सरकार सो हसदेव ल बचाये के गोहार लगाईच्च ।  छक्रांसे संगठन के तखतपुर विस उपाध्यक्छ दुल्हा उमेस कौशिक के कहना आंय हमर जंगल हर दुखद रुप ले कटत हे जेखर बर महुच्च हर बिकट दुखी हव अऊ इही बीच म मय लगिनहा हो गयेव त सड़क के लड़ाई नई लड़ पावत हव फेर सोच लेहे रहेव कि बिहाव म ही हसदेव ल बचाये के गोहार लगाके अपन छोटकुन योगदान देहू अऊ ए तरह ले मोर बिहाव हर सूरता रही ।