छत्तीसगढ़ी लs पढ़ाई लिखई के भासा बनाये बर अनसन के चेतावनी , भासा लs नियाय देवाये खातिर हाईकोर्ट जाये के किरिया घलो खाईच्च।

छत्तीसगढ़ी लs पढ़ाई लिखई के भासा बनाये बर अनसन के चेतावनी , भासा लs नियाय देवाये खातिर हाईकोर्ट के फईका खटखटाये के घलो लेहे गईच्च संकल्प..

आज रईपुर परेस कलब मँ छत्तीसगढ़ी भासा बर लड़ईया कई ठन संगठन मन संघर के विस्व महतारी भासा दिवस मनाईच्च जेमा हबरे लोगन मन एक सूर मँ किरिया खाईच्च कि छत्तीसगढ़ी के सम्मान बर अब के आर पार लड़ाई लड़े जाही ।

छत्तीसगढ़ी के हक अधिकार बर दिल्ली मँ सत्याग्रह कर चुके संगठन छत्तीसगढ़िया महिला करांति सेना के प्रदेस अध्यक्छ लता राठोर हर कहिच्च कि ए सुखद अवसर मँ हमन मयारु भुपेस सरकार लs आरो देना चाहत हन कि जल्दी ले जल्दी छत्तीसगढ़ी लs कक्छा 5 तक माध्यम अऊ 6वीं ले 12 तक अनिवार्य बिसय बनाके जगदलपुर मँ करे गये अपन घोसना ल पुरा करय । काबर कि अब आऊ कतेक अगोरबो ? सुग्घर नवा सिक्छा नीति घलो आ गेहे हे जेन हर बुनियादी सिक्छा के माध्यम छत्तीसगढ़ी ल बनाये के वकालत करत हे । नही त विधानसभा सत्र मँ हमन अनसन ,धरना करे बर मजबुर होबो फेर सरकार सो गोहार हे कि ए नौबत झन लावय। 

ऊहें छत्तीसगढ़िया अस्मिता बर लड़ईया संगठन छत्तीसगढ़िया क्रांति सेना के प्रदेस अध्यक्छ अमित बघेल हर कहिच्च कि ए सरकार ले बिकट उम्मीद हवय फेर पिराथे कि सरकार छत्तीसगढ़ी के पढ़ई लिखई के व्यवस्था करे ल छोड़ के अंग्रेजी माधियम के स्कूल खोलत हे..  सरकार ल छत्तीसगढ़िया के मांग ल जल्दी ले जल्दी सुरु करना चाहिये नही त हमर संगठन अपन तेजतर्रार तेवर मँ भासा के लड़ाई लड़ही।

छत्तीसगढ़ी ल बुनियादी सिक्छा के माध्यम बनाये बर पुरा प्रदेस के साईकिल जातरा कर चुके छत्तीसगढ़ी राजभासा मँच के परांतीय संजोजग नंदकिसोर सुकुल हर लोगन के ए संका ल दूर करिच्च कि भासा के माध्यम अऊ विसय के रुप मँ पढ़ाना अलग अलग चीज कईसे आंय , अऊ कहिच्च कि सरकार पराथमिक कक्छा मँ छत्तीसगढ़ी ल बिसय के रुप मँ ऊहु अधकचरा आनिक आधा आधा पाठ पढ़ाना तुरते बंद करय अऊ संविधान, नवा सिक्छा नीति के तहत छत्तीसगढ़ी ल माध्यम बनावय । काबर कि अब छत्तीसगढ़ी ल मान सम्मान नई दिही त कब दिही ?

छत्तीसगढ़ी बर बुता करे बर नाहके राजभासा दिवस मँ  मुखमंतरी के हाथ मँ सम्मान पवईया वयभव बेमेतरिया अऊ महिला विंग के रेनु जांगड़े हर कारकरम के प्रस्नोत्तरी सत्र संयुक्त रुप ले कहिच्च कि अपन महतारी भासा मँ सिक्छा पाना हर समाज के संवैधानिक अउ कानुनी अधिकार आंय तभो ले सरकार चेत नई करत हे । अईसनहा अनबेतराई मँ हाईकोरट के फईका खटखटवाके अपन अधिकार ल लेहे के बेरा आगे हवय।

 ए दिवस बर पुरा प्रदेस भर मँ छत्तीसगढ़ी बर बुता करईया लोगन के समिती दुवारा सम्मान करे गईच्च जेमा छत्तीसगढ़ी भासा के कलेन्डर बनईया ईस्वर साहु , छत्तीसगढ़ी भासा के एकमात्र टीबी समाचार बनईया नवीन देवांगन , लेखक गजेन बरमा , स्वराज एक्परेस के संदीप अखिल , गायक कांति कारतिक समेझ 10 लोगन ल सील्ड अऊ पारम्परिक लाल पटकु देके सम्मानित करे गईच्छ।

ए अवसर मँ परस प्रसिद्ध लोक गायिका रमा जोसी , रंगोली बिसेसग्य प्रमोद साहु, प्रवासी छत्तीसगढ़ियों बर बुता करईया असोक तिवारी, साहितकार सुधीर सरमा ,   प्रतिस्ठित PSC परीक्छा मँ पुछे जा चुके छत्तीसगढ़ी के पहिली उपन्यास   'दियना के अंजोर' के रचनाकार सिवसंकर सुक्ल नहर मंच ले अपन बिचार व्यक्त करिच्च। 
ए मऊंका मँ छक्रांसे अऊ महिला करांति सेना के कोरी कोरी सदस्य समेत सैकड़ो लोगन उपस्थित रहिच्च।