बेलासपुर एयरपोट के नामकरन सहीद वीर गुन्डाधुर के नाम मँ करे के मांग।

बेलासपुर के नवा एयरपोट के नामकरन लँ सहीद बीर गुन्डाधुर के नांव मँ करे के मांग।

बेलासपुर मँ जेन जगह ले हवई जिहाज उड़ाही अऊ उतरही , ओ जगह के नांव लँ महान स्वतंत्रता संग्राम सेनानी , बीर सहीद गुंडाधुर के नांव मँ करे के मांग लँ लेके आज छत्तीसगढ़ सर्व आदिवासी समाज  संगठन अऊ छत्तीसगढ़िया क्रांति सेना संगठन के बेलासपुर इकाई हर मुखमंतरी के नाम बेलासपुर जिलाधीस लँ मांगपाती सौपिच्च।

आपमन लँ आरो होहय कि लम्बा बेरा ले अगोरे के बाद बेलासपुर हर सुग्घर हवई सेवा ले जुड़त हे अऊ ए बात आघु आये हवय कि बेलासपुर ले भोपाल उड़ान सबले पहिली सुरु होहय । ए खुसखभरी के बीच मांग उठत हे कि नवा बने विमानतल के नामकरन लँ छत्तीसगढ़ के पुरखा , महापुरुस  के नाम मँ होवय । जेमा प्रमुख रुप ले छत्तीसगढ़ी के वीर बलिदानी गुंडाधुर ,  विरांगना बिलासा देवी  (बेलासपुर सहर के नामकरन जेखर नाम मँ होये हे)। नाम हे।

गियापन देहे के मऊंका मँ छत्तीसगढ़िया क्रांति सेना के बेलासपुर जिला संजोजक ठा. सईलु सिरवास हर कहिच्च कि छत्तीसगढ़ के मुल मँ आदिम संस्कृति हवय , हम सब मन इही माटी संस्कृति मँ रचे बसे हन अऊ इही बस्तर के माटी मँ वीर गुन्डाधुर जईसन कोहिनूर बेटा अवतरिच्च जऊंन हर अपन पराक्रम , आंदोलन ले फिरंगी मन लँ दिन मँ चंदैनी देखा देहे रहिच्च अऊ भारत दाई लँ अजाद करवाये मँ अपन जिनगी ल खपा दिहीच्च अईसे वीर सुपत के नाम मँ एयरपोट के नांव जरुर होना चाही।

ऊहे सर्व आदिवासी समाज के प्रांतीय उपाध्यक्छ सुभास सिंह परते हर कहिच्च कि बदकिस्मती आंय कि अईसनहा महान क्रांतिकारी लँ सरकार दुवारा लगफग भुला देहे गये हे। केवल तीरदांजी मँ एक इनाम बस एखर नांव से देहे जाथे । फेर ए सुग्घर मऊंका आये हवय कि छग सरकार हर बेलासपर मँ चालु होईया नवा एयरपोट के नामकरन लँ बीर गुंडाधुर के नांव मँ करके एला सितोन के सम्मान देवत जनभावना मँ मुहर लगावय।